Psalms 18

Wimbo Wa Daudi Wa Ushindi

(2 Samweli 22:1-51)

(Kwa Mwimbishaji: Zaburi Ya Daudi Mtumishi Wa Bwana Aliyomwimbia Bwana Wakati Bwana Alipomwokoa Mikononi Mwa Adui Zake Wote, Na Pia Mkononi Mwa Sauli)

1 ^aNakupenda wewe, Ee Bwana,
nguvu yangu.

2 ^b Bwana ni mwamba wangu,
ngome yangu na mwokozi wangu,
Mungu wangu ni mwamba,
ambaye kwake ninakimbilia.
Yeye ni ngao yangu na pembe ya wokovu wangu,
ngome yangu.

3 ^cNinamwita Bwana anayestahili kusifiwa,
nami ninaokolewa kutoka kwa adui zangu.

4 ^dKamba za mauti zilinizunguka,
mafuriko ya maangamizi yalinilemea.

5 ^eKamba za kuzimu zilinizunguka,
mitego ya mauti ilinikabili.

6 ^fKatika shida yangu nalimwita Bwana,
nilimlilia Mungu wangu anisaidie.
Kutoka hekaluni mwake alisikia sauti yangu,
kilio changu kikafika mbele zake,
masikioni mwake.

7 ^gDunia ilitetemeka na kutikisika,
misingi ya milima ikatikisika,
vilitetemeka kwa sababu alikuwa amekasirika.

8 ^hMoshi ukapanda kutoka puani mwake,
moto uteketezao ukatoka kinywani mwake,
makaa ya moto yawakayo
yakatoka ndani mwake.

9 ⁱAkazipasua mbingu akashuka chini,
mawingu meusi yalikuwa chini ya miguu yake.

10 ^jAlipanda juu ya kerubi akaruka,
akapaa juu kwa mbawa za upepo.

11 ^kAlifanya giza kuwa kitu chake cha kujifunika,
hema lake kumzunguka,
mawingu meusi ya mvua ya angani.

12 ^lKutokana na mwanga wa uwepo wake
mawingu yalisogea,
ikanyesha mvua ya mawe
na umeme wa radi.

13 ^m Bwana alinguruma kutoka mbinguni,
sauti ya Aliye Juu Sana ilisikika.

14 ⁿAliipiga mishale yake na kutawanya adui,
naam, umeme mwingi wa radi na kuwafukuza.

15 ^oMabonde ya bahari yalifunuliwa,
na misingi ya dunia ikawa wazi
kwa kukaripia kwako, Ee Bwana,
kwa uvumi wa pumzi kutoka puani mwako.

16 ^pAlinyoosha mkono kutoka juu na kunishika;
alinitoa kutoka kilindi cha maji makuu.

17 ^qAliniokoa kutoka adui wangu mwenye nguvu nyingi,
kutoka adui zangu waliokuwa na nguvu nyingi kuliko mimi.

18 ^rWalinikabili siku ya msiba wangu,
lakini Bwana alikuwa msaada wangu.

19 ^sAlinileta nje mahali penye nafasi tele,
akaniokoa kwa kuwa alipendezwa nami.

20 ^t Bwana alinitendea sawasawa na uadilifu wangu;
sawasawa na usafi wa mikono yangu amenilipa.

21 ^uKwa maana nimezishika njia za Bwana;
sijatenda ubaya nikamwacha Mungu wangu.

22 ^vSheria zake zote zi mbele yangu,
wala sijayaacha maagizo yake.

23 ^wNimekuwa sina hatia mbele zake,
nami nimejilinda nisitende dhambi.

24 ^x Bwana amenilipa sawasawa na uadilifu wangu;
sawasawa na usafi wa mikono yangu machoni pake.

25 ^yKwa yeye aliye mwaminifu, unajionyesha kuwa mwaminifu,
kwa asiye na hatia, unajionyesha kutokuwa na hatia.

26 ^zKwa aliye mtakatifu, unajionyesha kuwa mtakatifu,
lakini kwa aliyepotoka, unajionyesha kuwa mkaidi.

27 ^aaWewe huwaokoa wanyenyekevu,
lakini huwashusha wenye kiburi.

28 ^abWewe, Ee Bwana, unaifanya taa yangu iendelee kuwaka;
Mungu wangu hulifanya giza langu kuwa mwanga.

29 ^acKwa msaada wako naweza kushinda jeshi,
nikiwa pamoja na Mungu wangu
nitaweza kuruka ukuta.

30 ^adKuhusu Mungu, njia yake ni kamilifu,
neno la Bwana halina dosari.
Yeye ni ngao kwa wote
wanaokimbilia kwake.

31 ^aeKwa maana ni nani aliye Mungu
zaidi ya Bwana?
Ni nani aliye Mwamba
isipokuwa Mungu wetu?

32 ^afMungu ndiye anivikaye nguvu
na kufanya njia yangu kuwa kamilifu.

33 ^agHuifanya miguu yangu kama miguu ya kulungu,
huniwezesha kusimama mahali palipo juu.

34 ^ahHuifundisha mikono yangu kupigana vita;
mikono yangu inaweza kupinda upinde wa shaba.

35 ^aiHunipa ngao yako ya ushindi,
nao mkono wako wa kuume hunitegemeza,
unajishusha chini ili kuniinua.

36 ^ajHuyapanua mapito yangu,
ili miguu yangu isiteleze.

37 ^akNiliwafuatia adui zangu na nikawapata,
sikurudi nyuma mpaka walipoangamizwa.

38 ^alNiliwaseta hata hawakuweza kuinuka tena;
walianguka chini ya miguu yangu.

39 ^amUlinivika nguvu kwa ajili ya kupigana vita;
uliwafanya adui zangu wasujudu miguuni pangu.

40 ^anUliwafanya adui zangu wageuke na kukimbia,
nami nikawaangamiza adui zangu.

41 ^aoWalipiga yowe, lakini hapakuwepo na yeyote wa kuwaokoa;
walimlilia Bwana, lakini hakuwajibu.

42 ^apNiliwaponda kama mavumbi yanayopeperushwa na upepo;
niliwamwaga nje kama tope barabarani.

43 ^aqUmeniokoa kutokana na mashambulizi ya watu;
umenifanya kuwa kiongozi wa mataifa,
watu ambao sikuwajua wananitumikia.

44 ^arMara wanisikiapo hunitii,
wageni hunyenyekea mbele yangu.

45 ^asWote wanalegea,
wanatoka katika ngome zao wakitetemeka.

46 ^at Bwana yu hai! Sifa ni kwa Mwamba wangu!
Atukuzwe Mungu Mwokozi wangu!

47 ^auYeye ndiye Mungu anilipiziaye kisasi,
awatiishaye mataifa chini yangu,

48 ^avaniokoaye na adui zangu.
Uliniinua juu ya adui zangu;
uliniokoa toka kwa watu wajeuri.

49 ^awKwa hiyo nitakusifu katikati ya mataifa, Ee Bwana;
nitaliimbia sifa jina lako.

50 ^axHumpa mfalme wake ushindi mkuu,
huonyesha fadhili zake kwa mpakwa mafuta wake,
kwa Daudi na wazao wake milele.